«Roskosmos» amerikanlaryň Aýa barandygyny tassyklady.

«Roskosmos» döwlet korporasiýasynyň başlygy Ýuriý Borisow amerikan astronawtlaryň Aýda bolandygyny tassyklady. Bu hakda ol Döwlet Dumasyndaky «Hökümet sagadynda» eden çykyşynda habar berdi.

«Elimizde munuň dogrudygyny tassyklaýan tutaryklar bar — amerikaly astronawtlar Aýyň üstünden alyp gaýdan toprak nusgalarynyň bir bölegini rus kärdeşlerine gowşurdylar. Russiýanyň Ylymlar akademiýasynyň bilermenleri Aýdan getirilen topragy öwrenmek boýunça giň gerimli ylmy seljerme-barlag işlerini alyp bardylar. Ylmy netijeler getirilen nusganyň hakykatdan-da Aý topragyna degişlidigini ýüze çykardy. Bu bolsa amerikaly astronawtlaryň Ýeriň tebigy hemrasyna barandyklaryny tassyklaýar» — diýip, Borisow belläp geçdi.

Ýadyňyzda bolsa, 1969-njy ýylyň iýulynda Nil Armstrongyň ýolbaşçylygyndaky «Apollon 11» missiýasynyň kosmonawtlary adamzat taryhynda ilkinji gezek Aýa aýak basypdylar. Aý topragynyň nusgalaryny alyp, Ýere gaýdyp geldiler we kosmos ylmy gözleglerinde täze eýýamy açdylar.
Şeýle hem, Hytaýyň «Çanýe-6» («Chang'e-6») kosmos enjamynyň adamzat taryhynda ilkinji gezek Aýyň arka tarapyndan alnan toprak nusgalaryny Ýere getirendigini bellemelidiris. «Çanýe» ýa-da «Çan E» — gadymy hytaý mifologiýasynda Aý taňrysynyň adydyr.


Çeşme: tmcars.info