Nebsim agyrýar

awtor: BERDINAZAR HUDAÝNAZAROW

Ýetmişden soñ söýgi hakda gürläne,
Gaharym gelenok, nebsim agyrýar.
Gumuñ ýollarynda iññe gözläne,
Gaharym gelenok, nebsim agyrýar.

Men tagzym edýärin baryn berene,
Şöhrat bolsun öz sözünde durana,
Aklyñ azalanyn bilmän ýörene,
Gaharym gelenok, nebsim agyrýar.

Seýran etseñ ýakynlara, daşlara,
Sataşýarsyñ kölege dek başlara,
Öz özünden aşa göwnühoşlara,
Gaharym gelenok, nebsim agyrýar.

Dünýäniñ bar syryn biljek bolýana,
Böwregi bökmezden güljek bolýana,
Allañ bermedigin aljak bolýana,
Gaharym gelenok, nebsim agyrýar.