Söwer ýaryň wysalynda
Sabyr eýläp, arman çekdim.
Yşk odunuň jepasynda
Birýan eýläp, girýän çekdim.

Günbe-günden gussa dartyp,
Halym gende, otda ýanyp,
Söwer ýara kän garaşyp,
Sabyr eýläp, arman çekdim.

Ol ýar meni goýup derde,
Elem berdi, derman nirde?
Gözüm girýan ede-ede
Gussalary durman çekdim.

Tenha ýerde men perişan,
Gözlerimem eşki-girýan,
Yşk oduna ýanyp her ýan
Dilim aýdar: bilmän çekdim.

Yşk bilen men ýürek daglap,
Gözlem akar suw deý aglap,
Zyban bilbil deýin saýrap
Diýer gülüň zaryn çekdim.