Dem gysyp, damaga geldi ýüregim.
Gözlerimden bolsa ajy gözýaşym
Akyp gitdi.
Gysylypdyr kükregim,
Gyzardy didelem, egildi başym.

Salam, mähribanym!
Salam, ezizim!
Gelipdim ýanyňa didaryň küýsäp.
Unutmaryn,
Unutmadym henizem,
Gezip ýörün mydam seni höwesläp.

Çyglandy gozlerim.
Çyglandy zemin.
Kesekleri gysymlaýan elimde.
Bagyşla, goýupdym idegiň kemin,
Saralypdyr saňa netlän gülümde.

Ýatyrsyň, üstüňde toprak örtgüsi,
Topargyňy görýän. Barlygyňy duýýan!
Aramyzda aýralygyň perdesi,
Men seni görmeýän, sen belki görýäň?!

Asman öwrülmedi, ýyldyz gaçmady,
Bolmasa göwnüme Ahyrzamana
Gopdy.
Ýakdy.
Ýakan ody öçmedi.
Çäre tapylmady köýen ykbala.

Ýatyrsyň öňümde guma garylyp.
Gözlerimden akdy ajy gözýaşym.
Zalym ajal aldy.
Galdym aýrylyp.
Gyzardy didelem, egildi başym.


#Awtor:Amangeldiýew Durdymyrat