Güneş bizar etse, kölege boljak
Gözmonjugyň boljak gözler degende.
Gijeler ýoluňa Aý bolup dogjak,
Garaňkylyk gorkuzaýsa egerde.

Dälilerçe bolup, bozaly ýady
Dünýämiz synlaly, hiç zat eşitme.
Gözleň maňa aýdyp durka bar zady,
Maňa diňe gülkilerňi eşitdir.

Bilseň, men mydama seň bilen bolýan,
Göýberlende gözümdäki tutylar.
Dünýäň derdi bir ýan, goşgulam bir ýan
Barja derdim seniň bilen gutular.

Garaz, sözüm aýdyp durman hetjikläp,
Ähli zatdan ezizsiň sen, geregim.
Senden ýeke zadam talap etjek däl,
Söýýänligňi bilip dursa ýüregim.


Ylham GURBANALYÝEW