"Çäk" - oýlanma


Giden pursadyňdaky sessiz galan dymmalarymyň içinde, ruhumyň: "meni öldüren sen bolma..." diýip seslenişleri bardy. Duýmadyň..
Hiç kimsiz galmakdan gorkýan ruhymy, şol gün sansyz köpçüligiň içinde ýitirdim.
Bir gün ölsem hem ruhumyň "ölümsiz" bolmagyny isleýän 20 ýaşly men, bugün ruhymy ýitiren jesedim bilen bu sözleri ýazýan. Gideniňden soň ýüregime esli wagt bäri ýesir alnan käbir isleglerim babatda, çak edişimden hem aşa talapkär bolanyma göz ýetirdim. Sebäbi hem "seni" (ýagny asla maňa degişli bolmadyk adamy) söýüp, hem-de ruhumyň "ölümsiz" bolmagyny islemek, isleglerimiň "çäk" diýen zatdan binesip galandygyny aňlatmaýarmy?
Göräýmäge ýönekeý söz ýaly duýulýan bu "Çäk" sözi bizi birbada köp erbetliklerden saklamak bilen bir hatarda, gör niçeme ynsanlaryň hyýallaryny gursaklarynda garradandyr. Emma men näçe islesem hemsaňa bolan duýgularyma çäk goýmagy başarmadym. Men seni söýmekde çäkden çykanymy, sensiz garşy alan günumiň säherinde "ýoklugyň ýüregime uran ajy şarpygyndan" soňra duýdum.
Şahyr aýtmyşlaýyn: "Bir ynsany aşa söýmekligiň hasaby-ol ynsanyň ýoklugy bilen tölener". Pikrimçe men bu söýgüniň hasabyny tölemegimiň dowamlylygy bir ömrüme gider we munuň jezasy: ikimiziň asla "biz" bolup bilmezligimiz bilen çäklener.

© Abat AŞYRGELDIÝEWA