Juwanlygmyň ýürek beren söýgüsi,
Ýüregi ot edip ýakdy, neýläýin?!
Çyn söýginiň ezýet bilen görgisi,
Gözüme çöpüni atdy, neýälin?!

Söýüşdik ajaýyp baharyň güni,
Ýadyma salardy açylan güli.
Misli säherleriň öwüsýän ýeli,
Düýpsiz bir uçutdan atdy, neýläýin?!

Sawçy ugratdym, ata-enesi bermedi,
Gaçaly diýsem-em ryza bolmady.
Şeýdip, söýen gülüm maňa gelmedi,
Ter açylan gülüm soldy, neýläýin?!

Kamaty - misli bir dagyň jereni,
Haýrana goýardy her bir göreni.
O-da söýdi, aglap galdy ýüregi,
Enesi baýlyga satdy, neýläýin?!

Daýzasynyň ogly söýüp ýörmişin,
Özlerem barlyja, gurply ýermişin.
Çyn ekeni, söýgiň gözi - körmüşin,
Meni düýpsiz guýa atdy, neýläýin?!

Ýok diýp bilmän, enesiniň ýüzüne,
Razy boldy daýzasynyň sözüne.
"Söýýän" - diýip, ýaşlar aýlap gözüne,
Hoşlaşyk sözüni aýtdy, neýläýin?!

Ýetdi çyn söýginiň aýralyk tagty,
Ykbal bize berdi şeýlekin bagty.
Ýoldaşy Hak bolsun, ýoly-da ýagty.
Bu şygrym ýürekden çykdy, neýläýin?!

#:Awtor:Amangeldiýew Durdymyrat