2-nji bölüm.
Soltan dessine gelen adamyň Serwidigini aňdy, garaşýan başga biri däl-de özüdigini bildirmek niýeti bilen hemişekisi ýaly şol öňki goşgusyny heňe getirdi.
     -  Ýörseň, ýarym, guwanar men
        Serwi kamat boýlaryňa...
    Serwi tanyş setirleri eşidenden oglana tarap atyldy, gujagyna girip gollaryny Soltanyň boýnundan orady. Ýüzüni oglanyň döşüne mäkäm basdy, aglamak aglady. Ajy ýaşlaryň aňyrsyny saklar ýaly däldi. Iki ýyl bäri aýralygyň salýan azabyna çydam edip bilmedi. Soltan Serwini köşeşdirmek üçin ellerini aýryp, ýüzüni gyzyň ýüzüne golaýlatdy. Oglanyň gyzgyn demi Serwiniň ýüzüne çabyrady. Soltan sowuk elleri bilen gyzyň gözünden yzly-yzyna hünji bolup syrygýan ýaşlary süpürdi. Gaýnap çykýan gyzgyn damjalar sowuk barmaklara siňdi.  garaňkydan ýaňa bir-birini zordan saýgarýardylar, emma bu wagt ol möhüm däldi. Olar üçin biri-biriniň dem alşyny, ýürek urşuny eşitseler-de razydylar. Sag-salamat watan gullugyndan gaýdyp gelen ýary ine-de garşysynda, ondan  gözlerini üzman dur. Soltan Serwini bagryna basyp, gyzgyn mährine çoýmak isleýärdi, iki ýylyň aýralyk hasratynyň öwezini doldurasy gelýärdi, emma Serwini bu islegi bilen özünden çekindirmekden we gyzyň adyny garalamakdan gorkdy, biriniň olary görüp gyzyň öýündakilerine aýtmagyndan heder etdi. Serwiniň dem alyşyny eşidip dursa-da razydy. Soltana hal ýagdaý sorama zerurlygy ýokdy, özüni görüp duranyna Serwisiniň iki bolup bilmeýänini duýýardy.
Serwi buwagt boýy ýeten ulugyz bolsa-da çaga şadyýanlygyny edip owsun atýardy, ýüregi heýjana gelýärdi. Muňa bolsa Soltanyň gözi guwanýardy, ony öňküdenem has güýçli söýýardi. Süýjiden-süýji gürrüňler etýän ýaş juwanlaryň dünýäden gaýgy-gamlary ýok ýalydy. Şu pursada çenli olar bagtlydylar. Edil dessanlardaky aşyk-magşuklaryň biri-birinden jyda düşüşi ýaly nirelerdendir bir ýerden "aýralyk" atly "söýginiň" ganym duşmany bu ýaş juwanlaryň ykbalyny hem göz-açyp ýummasy salymda çepbe-çöwürdi....
      Soltanyň gözleri garaňkyda özlerine tarap çalt-çaltdan haýdap ýörap gelýän, eli fonarly garany saýgarmaga başlady. Ol gelýän garany görüp ini jigläp gitdi. " Bu ýerde biziň duşuşýanymyz hiç kim bilenokdy ahyry. " diýip pikir ýüwürtdi. Ýiti-ýiti seredip onuň kimdigini saýgarmaga synanyşdy, gözleri iki ýyl bäri görmedik bolsa-da tanyş göwräni tapawutlandyrmaga başlady, garaňkyda görýän adamyna ynanasy gelmedi. Serwi ýetip gelýän adamy görenokdy, ol oňa arkasyny öwrüp durdy. Golaýlap gelýäniň Güleş gelnejedigini aňan Soltanyň ýüregi tisginip gitdi, üstünden gyzgyn suw guýlana döndi, şagga der basdy, howanyň sowuklygyna garamazdan endamy gyzdy. Gijeki fonary galgadyp, gazap atyna münen Güleş gelnejäniň gelşinden bir belanyň gopjagyny Soltan duýdy. Serwi Soltana üns berenokdy, garaňky sebäpli onuň ýüzüni görüp bilenokdy. Serwi nämedir bir zatlary çalt-çaltdan gürrüň berýärdi. Bu wagt Soltanyň özüni diňlemeýänini bilip näme bolanyny sorady:
    - Näme boldy?! Nämä dymýaň?
     Onýança agyr göwräniň aýaklarynyň astynda ezilip, owaza gelýän ýapraklaryň şatyrdysy eşidilip başlady. Fonaryň ýagtysy özlerine gönükdirildi.
Okyjylara: Harp ýalňyşlyklaryna üns beren halatyňyzda, teswirlerde belläp geçmegiňizi haýyş edýärin.