Synla - her bir zatdan gözellik gözläp,
Synla - giň jahanyň kaddy-kamatyn.
Ýat, ýatasyň gelse boglup düýşlere
Sesini eşitmän jaňly sagadyň.

Uludan demiň al,
ýeňlet ruhuňy
Özüň bagtly duý!
Bagtly ýene-de!
Öňüňden çykana ýylgyryş paýla,
Ýylgyryp jogabyn gaýtar Güne-de.

Aýdym aýtmakçymyň?!
Zowladyp göýber.
Öýüň boldy, köçe boldy, parhy nä?
Duýsaň gursakdakyň on sekizdigin,
Elli bolsun, otuz bolsun, kyrky nä?

Biraz arzuw bilen duşuşyk gurna,
Unut şugün bergileriň sanynam.
Oturan ýeriňden dünýäni sora,
Saňa höwäsi bor, Çingiz hanyňam.

Ýagyşy söýýäňmi, alma saýawan
Kime näme?
Ýuw saçlarňy, ezil-de!
Ömür - saňa,
sen ömrüňe gerekli,
Ýaşaýarkaň bu ýaşaýyş hezildir.

Ylham GURBANALYÝEW