Söýmäñ söýeniñe degmeýänleri

Gerçeklere, gül gyzlara sargydym —
Söýmäň söýeniňe degmeýänleri.
Dag-deresiz bürgüt bolmaz bürgüdem,
Söýmäň söýeniňe degmeýänleri.

Depäňde saýaly bag bolup bilmez,
Arkaňda sarsmajak dag bolup bilmez,
Bal bolup garylyp, ýag bolup bilmez,
Söýmäň söýeniňe degmeýänleri.

Datly miweleriň pak bolaýmasyn,
Orta ýolda düýäň çök bolaýmasyn,
Ömrüň özi aşa ýük bolaýmasyn,
Söýmäň söýeniňe degmeýänleri.

Pelek seni her öwrümde pitiklär,
Duýgularyň hasap sorar, köteklär,
Ahmyr demir dyrnak bolup çitiklär,
Söýmäň söýeniňe degmeýänleri.

Rysgal arygyň köl bolup bilmez,
Ummana uçrasaň sal bolup bilmez,
Azaşan pursadyň ýol bolup bilmez,
Söýmäň söýeniňe degmeýänleri.

Erkiňi pelege baglasaň-da kä,
Uç tapmarsyň bagryň daglasaň-da kä,
Çyn gülmersiň çyndan aglasaň-da kä,
Söýmäň söýeniňe degmeýänleri.

Ähli zat ýerbe-ýer, saz görünse-de,
Dokuzyň taý bolmaz düz görünse-de,
Takdyryň palakdyr, tez görünse-de,
Söýmäň söýeniňe degmeýänleri.

Durmuş nämälim geljege çakylyk,
Kanunlary ebedilik, bakylyk,
Sakal ezýän däldir soňky tüýkülik,
Söýmäň söýeniňe degmeýänleri.

Ykbalyň ölçerip, aglap-gülüp gör,
Ýüregiňi para-para dilip gör,
Söýginiň özüne sala salyp gör,
Söýmäň söýeniňe degmeýänleri.

Howlukmaň, a:lyna çolaşyp duýgyň,
Ýeke iş bitirmez müňde bir gaýgyň,
Bir gün ykbal bolup geler çyn söýgiň,
Söýmäň söýeniňe degmeýänleri.