Ýok wagtym!!

Adamzat birneme sada bolupdyr,
Seniň ýigit wagtyň, meniň ýok wagtym.
Edep-ekram, ahlak moda bolupdyr,
Seniň ýigit wagtyň, meniň ýok wagtym.

Gämileň daýanşy ýaly ýelkene,
Mertligi bolupdyr äre mertebe.
Şan nesip etmändir ýeňles erkege
Seniň ýigit wagtyň, meniň ýok wagtym.

Obaň o çetinde ölse bir bende,
Bu çet göteripdir ýasyn gerdende.
Iman gözlenipdir ene ýerden-de,
Seniň ýigit wagtyň, meniň ýok wagtym.

Ýüzün däl, kalbyny bezäpdir zenan,
Gaşy däl, sözleri bolupdyr keman.
Sözden gaýtarypdyr ne-hä pul, ne mal,
Seniň ýigit wagtyň, meniň ýok wagtym.

Tehnika dolup dur ýitgiň deregin,
Indi adam aňsat tapýar çöregin.
Zähmet keşdeläpdir ynsan ýüregin,
Seniň ýigit wagtyň, meniň ýok wagtym.

Yöne ynsan başy aman bolmandyr,
Ýyrtylsaň, ýyrtygňy ýaman bolmandyr.
Biziňki dek ajap zaman bolmandyr,
Seniň ýigit wagtyň, meniň ýok wagtym.

Kerim Hallyýew