Ýaz ýagşy
Gökde güneş parlar ajaýyp howa,
Ýene-de baharyň adaty güni.
Baharyň howasy dertlere dowa,
Göterýär hemişe juwan göwnümi.

Soňam birden ýagyş ýagdy çabyrap,
Duýdansyz çagbasyn guýar bulutlar.
Älemgoşar görner gökden ýalbyrap,
Ezildim ýagyşa maýyl boluplar.

Üýtgeşikdi, lezzetlidi bu ýagyş,
Ynsan ýüregine ylham berýärdi.
Göýä, asla diňmejek deý joş urup,
Bahar yzyn üzmän çabga guýýardy.

Ýagyşly howadan dem almak welin,
Baryndan hezildi aramdy jana.
Gözel bu görnüşi ýaz ýagyşynyň,
Magşuk kalbym getirýärdi heýjana.

Arman tiz soňlandy bu ajap ýagyş,
Güneş ýene parlap nurlandy asman.
Maýsalarda ýitip gitdi damjalar,
Galmady ýagyşdan ýekeje nyşan.

Göýä, ýagyş ýagmadyk deý bu mahal,
Dolandy özüne göwnüm hyýaly.
Ýaz ýagşy basym sowuldy gitdi,
...Edil meni seniň söýşüň ýaly.
Annabeg Aýmakowa