Ne on bäş aýaldyr, artmaz perzendi,
Ol on bäş aýalyň üçi öwlatdan?
Üçi ekiz, on dört erer peýwendi,
Ol ne jymag eýlär, ne çykar ýatdan?

Ol ne halkdyr, gäh pelege gonarlar,
Gähi inip, ýer ýüzünde dynarlar?
Ol ne adamzatdyr, bir at münerler, —
Üzeňňisi suwdan, jylawy batdan?

Mydam seýre gezer ol dört deňi-duş,
Bolar ondan jümle älem ýüzi hoş,
O dördüň biri bar, mydam sebze puş,
Kellesi buzdandyr, aýagy otdan?

Ol kimdir, ýalaňaç garyp otyrmyş,
Owazsyz äleme sözün ýetirmiş.
Agzyn açyp, özün ýasa batyrmyş,
Sorasaň habar biýr saňa bar zatdan?

Magtymguly, salma ülkä owaza,
Bular görnüp duran zatdyr bu göze,
Akyl äriň pähmi ýeter bu söze,
Hajat ermes habar almak ussatdan.


📌 Teswirlerde jogaplaryñyzy galdyryp bilersiñiz)