Salı, 12 Mar 2024 06:52 PM

Tuýuglar

Salam Dürlim, ýagdaýlaryň ýagşymy ?!
Sözüň sazmy ýa-da ýazyň ýagşymy ?
"Gerçek goşgy ýazyp bilmez" diýýärler,
Synla indi ýagyş ýaly ýagşymy.

* * *

Ine saňa sähra, ine saňa düz,
Gelde oýna, ýaýna, saýra , goşgy düz.
Sazlansyn kapyýa, gözlensin many,
Gizlensin lirika, sözüň bolsun düz.

* * *

Ýürekdäkilermi aňla açyk ýüz,
Gelde söýgi ummanynda sende ýüz.
Seni söýüp gezýän başga dünýäde,
Arzuwlarym, armanlarym boldy ýüz.

* * *

Golundaky bir süýjije nar ýaly,
Göwsündäki ondan süýji nar ýaly.
Alma nary görüp jennetdir öýtdim,
Dowzahynda ýakdy meni nar ýaly.

* * *

Gurp galmady ne elde , ne aýakda,
Gurplyjadym geçenki aý aýakda.
"Aýaga çolaşyp ýörmäň" diýerdim,
Gör özümem galdym bu gün aýakda.

* * *

Ýap-ýaňyja gyzaranja , bir süýjije alma sen
Seni senden gabanaryn , meni menden alma sen
Nüçün kalbym jigläp gidýär şol ady eşdenimde?!
Çünki çagalyk söýgüm Çary gyzy Alma sen

* * *

Gerçeknazar Amannazarow