BOLAÝJAK GEŇ ZATLAR (parodiýa)
“Gel, söhbet edeli agzymyz ýumup”
B.Gökleňow.



Gözümizi ýumup göreli kino,
Agzymyzy ýumup aýdym aýdaly.
Elimizi daňyp ýüzeli suwda,
Derýaň aňyrsyna baryp-gaýdaly.

Ylgaşaly aýagmyzy duşaklap,
Işdämizi kesip, iýeli owkat.

Zowladaly öýkenmizi aýyryp,
Gowzadaly gapyrgalaň arasyn.
Ýüregmizi aýryp goşgy ýazaly,
Okan halamasyn ýa-da halasyn.

Parhy näme,
Çyksa bolýa ýazanmyz.
Bizem poeziýadan galmarys çetde.
Agzymyzy ýumup söhbet ederis,
Redaktor gözün ýumup gol çekse...


✏Atamyrat ATABAÝEW.