Sirkde we türgenleriň türgenleşiginde ulanylýan gorizontal görnüşde çekdirilip daňlan tora batut diýilýär. Bu enjamyň soňky ýyllarda çagalara niýetlenen görnüşleri çykarylyp, iň gyzykly güýmenjeleriň birine öwrüldi. Batutyň öý şertlerinde ulanmaga amatly görnüşleriniň bolşy ýaly, olara seýilgählerde hem duşmak bolýar. Çagalara niýetlenen enjamyň görnüşi, adatça toruň deregine çeýe matadan bolýar.
Eý sem, şeýle enjamy oýlap tapmak ilki kimiň kellesine geldikä?!

Amerikaly gimnastika mugallymy Jorj Nissen hem­-de gimnastikaçy Lerri Griswold 1935­-nji ýylyň tomus aýlarynda «Flying Wards» (Uçýan goragçylar) atly darbazlyk toparynda işleýärdiler. Olar dürli oýunlary guraýan toparda torlary bejer­mek bilen meşgullanýardylar. Nissen kiçijik toruň türgenleriň has ýokary bökmeklerine ýardam et­jekdigi barada pikir edýär. Nissen bilen Griswold öýleriniň howlusynda üstüne müneňde has ýoka­ry bökdürýän tekizligi döredýärler. Olar galyň bi­ziň daşyna birnäçe ýaý berkidýärler. Soňra bolsa matanyň ýaýlaryny demir gazyklara berkidýär­ler. Şeýlelikde, olar soňlugy bilen batut (iňlisçesi «trampoline») diýlip atlandyryljak enjamy döred­ýärler we ýasan enjamlaryny Aýowa uniwersiteti­niň ýazky lagerine äkidýärler. Bu täsin enjama ta­lyplar uly gyzyklanma bildirýär. Nissen bilen Lerri bu enjamyň üstünde görkezme çykyşyny taýýar­laýar. Soňra bolsa, iki bolup, ýüpde deňagramlyly­gy saklamagy we dürli darbazlyk tärlerini öwren­ýärler. Bu ugurda ökdeleşen iki dost Meksika gidip, şol ýerde dürli görkezme çykyşlaryny ýerine ýetir­ýärler. Nissen bu ýurtda ispan diline hem ökdeleş­ýär. Ispançada «Canguro» – «çakgy», «aeroplano»
– «guw böküşi» diýmegi aňladýar. Bökülýän tagta­nyň ispançasyna bolsa «el trampolin» diýilýär. Nis­sen ispança sözüň yzyna «e» harpyny goşup, onuň iňlisçesini döredýär. Bu enjamyň ady käbir dillere fransuzçadaky «urgy» diýmegi aňladýan «batude» sözünden geçipdir. 1942­-nji ýylda «Griswold­Nissen» trambolin we darbazlyk kompaniýasy esaslandyrylýar. Şol ýyl­lar bu kompaniýanyň döreden batutlary uçarman­laryň türgenleşmegi üçin hem peýdalanylypdyr. Dartylan ýüpüň, simiň üstünde oýnaýan oýunça
darbaz diýilýär.