Kanagatly ýaşuly

Bir wagtlar özüniň sahawaty bilen meşhurlyk gazanan Hatam Taý uly zyýapat berip, gelen myhmanlara halat-serpaý baryny ýapýar. Soňra-da bir iş bilen çöle çykýar. Görse, bir garry adam arkasynda bir petde ýandagy ýükläp barýarmyş. Ýandagyň tikenleri gojanyň endamyna batyp, persala edýärmiş.

Hatam Taý oňa ýüzlenip:

– Ýaşuly, Hatam Taý myhman baryny çagyryp, uly zyýapat berýär, sowgat-serpaý ýapýar. Sen hem şonuňka bar. Bu ýandagy satyp bäş teňňe gazanýan bolsaň, Hatam Taý saňa azyndan ýüz tylla sowgat berer – diýýär.

Goja şonda Hatam Taýa şeýle jogap berýär:

– Meniň üçin bu tikenli ýükümi öz mertebäm bilen götermek Hatam Taýyň minnetini göterenden has ýeňil.

Soňra bir gün Hatam Taýdan:

– Sen özüňden has sahawatly, has juwanmert, has mertebeli adam gördüňmi? – diýip soraýarlar. Hatam Taý:

– Sährada öňümden çykan şol kanagatly ýaşuly menden has mertebeli, has eziz, has juwanmert adamdy – diýip jogap berýär.

Çeşme: Internet maglumatlary

#Ylymly..