Bir wagtlar bir gyzjagaz ajaýyp tawus guş görüpdir-de:

− Menem sen ýaly owadan bolsadym – diýipdir.

Tawus guş:

− Bu meniň üçin aňsat. Sebäbi meň jadygöýlikden başym çykýar. Häziriň özünde seni tawus guşuna öwreýin – diýipdir.

Tawus guş ganatlaryny, guýrugyny ýokaryk galdyryp, jadysyna başlajak bolup durka, birden saklanyp:

− Ýöne men käbir zatlary öňünden bilsem gowy. Men ýaly owadan guş boljak bolsaň, men seni tawus guşuň horazyna öwürmeli bolýan. Ýene bir zady aýratyn bellemeli, tawus guşa öwrülseň her ýyl, gije-gündiz şol bir eşigi çykarman geýmeli – diýipdir.

Onuň bu sözlerini eşiden gyzjagaz ol ýerden daşlaşmak bilen bolupdyr. Öýüne baran badyna hem eşigini çalşyryp, başga eşiklerini geýipdir.

***

Adam diýeniň käwagt başga biriniň boýuna, saçyna, kilesine, gözüniň reňkine höwes edegen bolýar. Bu bolsa dogry däl. Her kim öz ýagdaýyna şükür etmeli.

Bir wagtlar siýam ekizler bar eken. Arkalary bir-birine bitişik bolany üçin gezekleşip biri-birini göterýän ekenler. Bir gün ekizleriň biri:

− Boldy, besdir. Men-ä ýadadym, indi göterjek däl – diýip baş göterýär.

Şol wagt hem ýoldan geçip barýan kişi:

− Beý diýme jigi! Ýagdaýyňa şükür et, beterinden beteri bar – diýýär.

Ýaňky baş göterýän:

− Mundan beter näme bolsun?! – diýip, ýene nägile bolýar.

Aýlar-günler geçip, ekizleriň biri syrkawlap aradan çykýar. Şükür edesi gelmeýän ekiz:

− Gör, nähili gowy eken. Men ýadan wagtym jigim, jigim ýadan wagty men göterýärdim. Indi bolsa, diňe men götermeli. Hakykatdanam, beterinden beteri bar eken, düşündim. Ýöne giç düşündim – diýip şükür etmedigine ökünýär.