Kitaplar barada nämeler bilýärsiňiz?


Kitap durmuşymyzyň bezegi. Kitaplaryň syrly dünýäsi bar. Ol dünýäniň syrlaryny açmak okyjynyň paýyna düşýär. Munuň üçin bolsa, diňe kitaby dost tutunyp okamak gerek. Kitap okamak ynsanlaryň dünýägaraýşyny giňeldýär, pikirlenişini ösdürýär. Ynsanyň ýakyn we ynamdar dosty bolan kitaplar barada biläýmeli zatlarymyz kän. Geliň, olaryň käbirleri bilen tanyş bolalyň.

Dünýädäki iň äpet kitap “Çagajyklaryň dünýädäki iň uly kitaby” diýlip atlandyrylýar. Kitabyň uzynlygy 6 metr, ini 3 metr. 492 kilograma deň bolan bu kitap 4 sahypdan ybaratdyr.

*****

Anton Pawlowiç Çehowyň “Hameleon” kitaby dünýädäki iň kiçi kitap hasaplanýar. Bu kitap 2002-nji ýylda dünýäniň iň kiçi kitaby hökmünde rekordlar kitabyna girdi.

*****

Angliýanyň Uestberi-sab-Mendibi şäherçesinde ýerleşýän gyzyl telefon “öýjagazynyň” içinde ýerleşýän kitaphana dünýäniň iň kiçi kitaphanasy hasaplanýar. Geň ýeri, bu kiçi kitaphanadan 100-e golaý kitap neşirlerini tapmak bolýar.

*****

Basma harplar bilen ýazylan iň galyň kitap “WIKIPEDIAL” diýlip atlandyrylyp, onuň 5000 sahypasy bar. Bu kitap Rob Metýusa degişlidir.

*****

Dünýädäki iň gymmat satylan kitap “Lesteriň kodeksi” diýlip atlandyrylýar. Italýan hudožnigi Leonardo da Winçiniň sungat eserleri hem-de olaryň syrlary hakynda ýazylan bu kitaby Bill Geýts 30,8 million dollara satyn alypdyr.

*****

“Britaniýanyň parlament dokumenti” diýlip atlandyrylýan kitap dünýäniň iň köp dilde çap edilen kitaby hasaplanýar. 6 ýyllap gije-gündiz neşir edilen resminama hasaplanýan kitap 1112 tomdan ybarat we onuň agramy 3300 kilograma deňdir.



Aýlar ATAJYKOWA.