Gowy günler gözümizden gitmesin,
Geliň, bir-birege mährem bolalyň.
Namardyň, näkesiň dili ýetmesin,
Geliň, bir-birege mährem bolalyň.

Durmuşdyr bu,
Şatlygam bor, hasrat-da,
Gara gözler gark bolmasyn gaflatda.
Hemmäň göwni saldamlyda, agrasda,
Geliň, bir-birege mährem bolalyň.

Çyn gülküler bolar ömre barabar,
Günler uçar guşdur, yzyn garamaz.
Göwün näzik, doňsa aňsat eremez,
Geliň, bir-birege mährem bolalyň.

Ýalan aglamalyň, ýalan gülmäliň,
Bagtyýar günlerde ösüp, gülläliň.
Öýke-kine diýen zady bilmäliň,
Geliň, bir-birege mährem bolalyň.

Bu günler beýikdir, bagtly döwürdir,
Ýagşylykly günler baky ömürdir.
Taňry ak ýüzüni bize öwürdi,
Geliň, bir-birege mährem bolalyň.

Rejepgeldi Mejikow