– Ýaranlar, bu dünýäň peýany bolmaz.
Bir manat berseňiz zyýany bolmaz.

– Bardyr, bu dünýaniň peýany bardyr,
Bir köpuk bersegem zyýany bardyr.
Her kimiň öýünde çagasy bardyr,
Her kimiň öýünde aýaly bardyr.
– Çagadan artdyrsaň zyýany bolmaz.
Aýaldan artdyrsaň zowaly bolmaz.
Kimde-kim panyda ajy doýursa,
Bakyýa baranda sowaly bolmaz.

– Açlaryň gyrmyzy ýaňagy bolmaz.
Sagdyn eli, sagdyn aýagy bolmaz.
Elinde aldawçy taýagy bolmaz.
Aýda bir geline talagy bolmaz.
Öýde gyzyl dişli Äşesi bolmaz.
Amanat kassada pişesi bolmaz.
Jübsünde ýarymlyk...
diýenem şoldy –
«Gedaý» gözümizden ýitirim boldy.

Kerim Gurbannepesow