Adam gadyryn bilmän ýören adamdan,
Ondan yene otlap ýören mal ýagşy.
Söz manysyn bilmän sözlän adamdan,
Ondan ýene sözlemeýen lal ýagşy.


Hudaýym saklasyn şerden, gahardan,
Minnetli aş ajy bolar zäherden.
Eý ýaranlar, bir bazarsyz şäherden,
Ondan ki bir güwläp ýatan çöl ýagşy.


Her kimiň özüne müsürdir jaýy,
Ýadyndan çykmaýyr baýramy toýy.
Jan saglygyň bolmaz hiç deňi taýy,
Agşam ýatyp, ertir şükrün kyl ýagşy.


Bihuda köp ýara gülüp sözleme,
Yşk oduna ýürek bagryna duzlama.
Märekä barganda bijaý sözleme,
söz sözleseň söz jaýyna sal ýagşy.


Bu dünya diýgeniň köne saraýdyr,
Owwaly toý baýram, ahyry waýdyr.
Bu dünýade hemme bäş gün myhmandyr,
Bir biregiň gadryn yene bil ýagşy.


Bir biwepa yara gülüp bakandan,
Şirin jany yşk oduna ýakanda.
Ýat illerde mysapyrlyk çekenden,
Ursa, sökse, horlasada il ýagşy.


Magtymgulyň, sözlegli sen her bapdan,
Bu dünya tutdurmaz, çürükdir düýpden.
Aňarysy gelmeýen gury, bat gepden,
Ondan ki bir şuwlap öten ýel ýagşy.


Magtymguly Pyragy.