Men – adam.
Ýaşamak üçin geldim.
Emma ne howam bar,
Ne-de meň üçin akýan suwum.

Men – adam.
Elim, aýagym özümiňki.
Ýöne ne-hä isleýşimçe ýaýnap bilýän,
Ne-de gidesim gelen ýere gidýän.

Men – adam.
Ýürek şygyr küýseýär.
Emma ýazasym gelşi ýaly ýazsam,
Diýesim gelenini diýsem,
Ýa-ha akylsyz,
Ýa-da ýakymsyz bolaýýar.

Men – uly adam
Maksat-myradym,
Arzuw-umydym ullakan.
Ýöne ýaşaýan ýerim,
Gözýetim, hereket çygrym,
Edil kapasa ýaly.

Men adammy?!
Islegim özümden soralmasa,
Erkimi her kime bersem,
Iýjegim minnet,
Howam minnet,
Suwum bulanyk...

Men – adam,
Ýöne käbir öňýeteniň gözüne
Men näbelli bir jandar...

Gurbanmyrat Saryyew