Ýüregime. » Öwrenmeli App

15.01.2024 01:18

Ýüregime.

Bu gün näme ýene gysýarsyň, ýürek,
Atyldymy ýene şo köne kesek?!
Neçüýn beýle ses-sedasyz aglaýaň,
Indi dar bolýarmy öňki giň ketek?!

Bu gün näme ýene gysýarsyň, ýürek,
Ýeňişlerden köpelýärmi, ýeňlişiň?!
Özüň-ä mydama ýazgaryp gelýäň,
Käbirlerniň çybyk kimin eglişin.

Bu gün näme ýene gysýarsyň, ýürek,
Birden-birden eýläk-beýläk urunýaň,
Öňler aglan oglan emýärdi emmek,
Indi agladygyň derrew urulýaň.

Bu gün näme ýene gysýarsyň, ýürek,
Şükür, hiç zatdanam däl sen hantama!
Tamaly döwürden göçdi obalar,
Indi tama etseň daňylýaň tala…

Bu gün näme ýene gysýarsyň, ýürek,
Hersi birýan çekýä, çep hem sag gözüň,
Nije dostum, ýakynlarmy ýitirdim,
Kim doldurar indi olaň öwezin?!

Bu gün näme ýene gysýarsyň, ýürek,
Ýa, dilsiz galdymy dil beren dilber?!
Öz göbek ganymyň daman ýerinde,
Ýa gülsüz galdymy üzümli dalbar?!

Bu gün näme ýene gysýarsyň, ýürek,
Ýeterlikdi bize sähelçe ümler.
Ýa-da bir zatlary ýaşyrýaň menden,
Ömri gysgalýarmy, sanalgy günleň?

Öňem dodakdaky uçuklarymyň,
Dişimi gysýany ýetikdi, ahyr!
Bu gün näme ýene gysýarsyň, ýürek,
Döretjek bolýaňmy ýa menden şahyr?!

Sädi SÄDIÝEW.