Kerim Gurbannepesow.
"SÖÝGI HEM MODADAN GAÇÝAR DIÝDIŇMI"


Söýgi hem modadan gaçýar diýdiňmi?
Hak aýdýaň, söýgä-de ýetipdir moda,
Kä gyz şu gün irden birini söýse,
Ertir irden düşýär başga bir oda.


Ýaşlar gazetinde okadym bir gün,
Gurban diýen ýigidi söýüpdir bir gyz.
Onsoň Şamyrady, onsoň Igdiri,
Häzirem söýýärmiş gazak ýigidini,
Ertir kimi söýjek belli däl heniz!


Odisseý her kim-de bir bolmalydyr,
Çalyşyp ýörmek bolmaz täze-täzeden.
Täze küýzäň suwy sowukmyş diýip,
Içip ýörmek bormy munça küýzeden?!


Öňler söýgi hakda gürrüň açylsa,
Gyzlaryň tarapyn çalardym hökman.
Indi bolsa gyzlaryň käbirini görüp,
Olaryň söýgi diýýän zadyndan gorkýan."