Durmuş, saňa soragym bar!
Ne üçin berýäň bize ezýet?
Adamlary gamlandyrman,
Senem şatlan, senem hezil et!

Aýtsana seň aryň barmy,
Ne derdiň bar ynsanlardan?
Indi bizä halys irdik,
Seň jogapsyz mysallaňdan.

Aglap otyr hanha zürýat,
Ýitiripdir käbesini.
Gam derýada gark etjekmi,
Alyp elden gämisini?

Nalap otyr bir görgüli,
Saňa bolan höwesi ýok.
Şu bolşuňa-ra seni,
Hiç bir adam söýesi ýok.

Ejiz görseň lezzet alýaň,
Aladaň ýok kömek etmek,
Bar maksadyň, oý-pikiriň,
Ejizleri ezip gitmek!

Adam pahyr arzuw etýär,
Senem oňa garşy çykýaň.
Dillensene hötjet durmuş,
Şeýdip bizden näme utýaň?

Ýalan söýgem seň işiňmi?
Söýeni çatýaň söýmeze.
Şular ýaly hokgalaňdan,
Giň dünýä bu gün dar bize.

Soňsuz synaglaryň bilen,
Elde aldyň barymy sen,
Aýtsana günä bizdemi,
Durmuş, şeýle zalymmy sen?

Bellik: Süleýman Tekäýewiň kömegi bilen ýazylan.

M.Nuranow.