Saňa duşalym bäri, däli köňlüm derbeder.
Yşk deňzinde arzuw-hyýal ýelken kimin ýellener.
Ejap eýläp dymsaň-da sen, ala gözleň dillener,
Sözle, näme diýdigiň ol, elheder gyz, elheder.
Gyýk bakyşyň aklym alyp, enteder gyz, enteder.

Hyýalymda beýle bagty agtarmandym häli men,
Senden zyba näzenin gyz elgerdäýmez päle hem.
Hala ýandyr, hala söndür, gandyr meni hala sen,
Ýogsa meni ýowuz ykbal, enteder gyz, enteder.

Ýeldirgedim ogryn garap, göwnüm awlan keşbiňe,
Ýeldirgedim ogryn garap, yşky lowlan çeşmiňe,
Bu aýdyma syrym berdim, sen günämi geç diňe,
Saňa syrym ýaýdygym ol, elheder gyz, elheder.
Ýogsa meni sensiz ykbal, enteder gyz, enteder.

Öz roýuna buýsanmaga ejap eýläp ýörenim,
Saçyn ýere deger öýdüp, başa aýlap ýörenim.
Eger görseň sözläp bilmän, seni peýläp duranym,
Saňa söýýän diýdigim ol, elheder gyz, elheder.
Eger söýgi ýalňyz galsa, enteder gyz, enteder.

Nobatguly Rejepow