Bir zadyň jogabyn bereliň başda,
Ynsan garrar, söýgi garramaz eken.
Juwanlyk söýgüniň lezzeti başga,
Ynsan garrar, söýgi garramaz eken.
Biz-ä jahyl,
günde bir gül yşgynda,
Ýüz müň hyýal bardyr köňül köşgünde,
Näçe ýyl geçse-de juwan joşgunda,
Ynsan garrar, söýgi garramaz eken.
Saý-sebäp şaýady boldum meýlisiň,
Yşk bilen diňledim aýdymyň sesin,
Söýgüsin ýatlaýar ýaşuly nesil,
Ynsan garrar, söýgi garramaz eken.
Uzaklara bakyp garryja ene,
Ýatlama deňzine gark boldy ýene,
Geçse-de üstünden ençeme sene,
Ynsan garrar, söýgi garramaz eken.
Dünýäde bar bolsa bakylyk eger,
Söýgüniň özüdir bakylyk meger,
Ençe söýgüniň şaýady bu goja ýer,
Ynsan garrar, söýgi garramaz eken.
Ilmyrat Babaýew