Reňkler hem çyzyklar bilen pikirlenýän şahsyýetler hakda ýazmak, olaryň dünýäsine, dünýägaraýşyna düşünmek — sözler arkaly oýlanýan ýazyjy-şahyrlar hakda ýazanyňdan has kyn.

Mysal üçin, çekilen käbir suratlaryň bizde galdyran täsirini näme bilen düşündirjek?

Aýdaly, Da Winçiniň "Mona Liza" eseriniň nämesi üýtgeşik? Pikassonyň "Genrikasyny" synlanyňda nähili duýgulary başdan geçirýärsiň? Moneniň "Suw liliýalarynyň" syry nämede, näme üçin suwuň ýüzündäki ol güljagazlar oda çalym edýär, näme üçin şol suraty satyn alanlaryň ençemesiniň öýüni ot aldy, ýöne suratyň özüne ýalyn degmedi (hawa, şonuň ýaly geň-taň täsinlik bolup geçen). Wan Gogyň "Ýyldyzly gijesi", Endrýu Waýetiň "Kristinanyň dünýäsi"... ýaly eserlerini, ýa Bäşim Nuralynyň dutarly oglanjygyny... göreniňde bir sellem saklanyp, oýa batanyňy duýman galýarsyň (sungata, hyýalbentlige hem gözellige "açyk" adamlaryň aglabasynda-ha şeýle).

Reňkleriň ýönekeýje sazlaşygynda-da täsin syr ýaşaýan borly, olar kalbymyzda, aňymyzda söz bilen beýan edip bolmaýan sesler bilen seslenýär.


Çeşme: "Dünýä edebiýaty" žurnaly