"Şahyryň aýaly kimin
Ýokdur çydamly aýal.
Günde äriň başyna
Gelip dur ýüz-müň hyýal

Bir gözeliň gamzaly
Gaşyny taryplaýar,
Bir gözeliň on sekiz
Ýaşyny taryplaýar.

Bir gözeliň eliniň,
Işine alkyş aýdýa,
Bir gözeliň dürdäne
Dişine alkyş aýdýa.

Zire-zire zülpleriň,
Taryny taryplaÿar,
Garaz, gaýry gözeliň
Baryny taryplaýar.

Müýnürgemekden geçen
Ýazdygy okap berýä,
Sähelçe at daksaňam
Uçursyz gaty görýä.

Özgeleriň waspyny
Takatly diňlemeli,
Meniň çydap ýörşümi
Görenler geňlemeli.."

Diýip, joraň ýanynda
Gürlediň güle-güle,
Menem göwünlik berdim
Saňa batyrlyk bile :

- Ejiz aýaly şahyr
Asyl-ha alyp bilmez,
Ylham oduna ejiz
Uçgunam salyp bilmez.!

Ata Atajanow