Nar gadymy döwürlerden bäri köp hasyllylygyň simwoly hasaplanýar. Naryň suraty Müsür piramidalarynda-da duş gelýär. Tas ähli sökelliklere garşy peýdalanandygy sebäpli, ir döwürlerde köp halklarda nara «Behişt miwesi» diýlipdir.

Naryň dänesini owradyp iýmek kellagyryny aýyrýar, gan basyşyny peseldýär. Onuň dänesinden taýýarlanan ýag kosmetologiýada giňden ulanylýar. Naryň suwy böwrekdir bagyr üçin örän peýdalydyr. Onuň düzümindäki F we E ýokumlar ýag erediji häsiýete eýe bolansoň, deriniň juwanlaşmagyna we beden öýjükleriniň sazlaşykly täzelenip durmagyna ýardam edýär.

Naryň gabygy ir döwürlerden bäri halk lukmançylygynda peýdalanylyp gelnipdir. Ony owradyp, külke görnüşde ýara sepipdirler, sowuklamadyr soguljanyň garşysyna göreşmekde-de naryň gabygy gaýnadylan suwy beripdirler. Naryň gabygy gaýnadylan suwa çaýkamak arkaly agyz boşlugyndaky ýaralary hem bejeripdirler.