Ene dilim, bu gün owazyň çirkin,
Senden üstün gelýär kinosy türküň,

Beýnim " Mizemedik nesilsiň" diýýär,
Inim "Neneň?" diýmän, "Nasilsin?" diýýär.

Arada çykyşda ýaş alymsumak,
Kä sözleri bilen doldurdy damak:

"Düşündirjek" size diýmäň deregne,
"Açıklaýyn" diýen bolýar ol "terne".

Türkmençedir öýdýäs türküň kelamyn,
"Salamyň" deregne diýýäs "selamyn".

Atlar aslymyzdan terkleşip barýar,
Gynanýan, olaram türkleşip barýar.

Kemelipdir " Döwran, Döndi, Kemine"
Köpelipdir "Elif, Emir, Emine...".

Arada ýygnakda bir "ýer ýuwudan"
Diýýär: "Türküň dili juda owadan".

Bulaň bary biziň günämiz elbet,
Dilimizden ýasap bilemzok şerbet.

Kaýsy ilde joşsa döredijilik,
Dilinde kän bolar, bal, nabat, ýilik.

Haýsy dile köpräk ysnyşsa beýni,
Şol dile döreýär isleg we söýgi.

Dili bilen kalba güýç, ynam berýän,
Ne kino döretdik, ne-de bir serial.

Gaýtalap, "Meleguş", "Şükürbagşyny",
"Kasettalar" boldy, syçanlaň hini.

Elbetde, "Dil - baýlyk" diýipdir peder.
Ony beýniň bilen öwrenmek ýeter.

Kalbyňa sygdyryp, uýup durk bilen,
Gerek däl türkmeniň ata ýurdunda
Bäsleşip ýaşamak, rusdur türk bilen.

Haýyşym, goraly ene dilimiz,
Işleýärkä beýni bilen elimiz.

Goraly döredip süýji sungaty,
Goý, artsyn ýürekleň ruhy nygmaty,

Döredeli kino, serial, şygyr,
Ony gadym diliň labzyna ýugur.

Türküň dili türkde, rusuňky rusda,
Ýaşasyn her bir dil mynasyp ýurtda.

Ýalbarýan gaýtalap öwranma - öwran.
Ene dilim sürsün bu ilde döwran.

Awtory: Kerim Hally

Bellik: Arada öwrenmelä täze gelen agzamyzyň biri türkçe ýazýardy diňe, "ýazma" diýsem:"ýazjak men türkçäni gowy görýän" diýdi.
Ilki bilen şoňa, soňra-da şonuň ýalylar üçin goýdum.