Sen rahat ýatyrsyň,
Gapdalyňda men
Otyryn boş goýup ýassygyň ýaryn.
Şu çaka çen, seniň bilen geçilen
Günleri bir-birden ýada salýaryn.

Düşünip bilemok, nämedi eýsem
Düýp sebäbi saňa sataşan derdiň?!
Işden sähel gijä galyp geläýsem,
Saçlarymy ysgap-yasgap görerdiň.

Bilýärdim seň oda düşüp ýöreniň,
Ýaşyrsaňam, bilýärdim men baryny.
Taparyn öýdýärdiň eşiklerimiň
Epininden yat saçlaryň taryny.

Köýnegimden ysyn alyp öz eliň,
Köşeşerdiň ysgap gören badyňa.
Wah, duş gelmek isläňokdyň özüňem
Yhlas bilen gözläp ýören zadyňa.

Bilmedik bolardym, aňsam-da muny,
Senden ýüz öwürip, terse bakmadym.
Gabansaňam, söýgiň bilen sen meni
Garaşýan zadyňdan gorap sakladyň.

#Atajan Annaberdi.