Ezizim!
Henizem güýzi-
Şol güýzi ýatlaýan sensiz,
Görşeris ýene ikimiz,
Nirede? Haçan? Neneňsi?

Seni saklaýar edebiň...
Meni näme? Özüň bilýäň.
Käýarym, baryp ebedi,
Ýanyňda galasym gelýär!

Mümkin däl!
Ýok, bu mümkin däl!
Saýyl men, ýoluňda saýyl.
Göwün guşum meň pel-pelläp,
Bir görüp gaýtmaga kaýyl.

Elmydama, ynsan, bagty
Elindekä bolman hüşgär-
Ol ony ýitiren wagty,
Eňräp oda-köze düşýär...
Asman syrlaryn öwrenen,
Demini ýöreden dünýä-
Adam öz däli göwnüne,
Bilmeýär, buýrup bilmeýär.

Sensiz!
Günler gamly çaksyz,
Ezizim, arýan, men arýan.
...Ah bu ýyllar galňadykça,
Ýüregim ýukalyp barýar...

Annamuhammet Kirşen