Men ölmekden gorkýan,
Ýaşasym gelýär.
Synlap bu älemiň ýagşy, ýamanyn.
Ýetip bilenlermi ýetime paýlap,
Ýetip bilmedigme dolup damagym.

Men ýagty jahandan gitmekden gorkýan,
Jogapsyz galdyryp ene azabyn,
Entek musulmanlyk parzymam üzmän,
Sesine oýanýan, her gün Azanyň.

Goý, bolsun ýalançy,
Ýaşasym gelýär.
Aldanasym gelýär onuň päkligne.
Agram berip ýörkäm mele topragna,
Ynanman Watana karzym ýokdugna.

Parzym, karzym, belki bahanamdyr meň,
Men ölmekden gorkýan (isle gülsünler),
Ýöne şeýleräjik ýaşasym gelýär,
Ýürek duransoňam dürtüp görsünler,
Soň-soňlaram şübhelenip ýörsünler.

Awtory: Kerim Hallyýew