Gerek

Ömre saglyk, saka bolsun durmuşda,

Iýmä hörek, geýinmäge jul gerek,

Ahlak, ynsap hemra bolsa bir başda,

Imanyňa Haka hakdan gul gerek.

Erkana gez, bakyp, degre-daşyňa,

Akyl, güýjüň laýyk gelsin ýaşyňa,

Tötänlikde bir iş düşse başyňa,

Dogan, dost-ýar, harajada pul gerek.

Eýeleseň wezipeleň birini,

Eýgerjek bol, tapyp onuň tärini,

Her hünäriň pyrlandyrma pirini,

Hak bermişli pata, soň usul gerek.

Ölçer öňden, aklyň gözde durlansyn,

Niýetiňden, ýüzüň-gözüň nurlansyn,

Aňsat däldir, başdan şeýle gurlansoň,

Dartyş güýje, dartgynlylyk bol gerek.

Gezmäwer geleňsiz, bähbidi bolmaz,

Görgüsin görmedik, piňine almaz,

Soňraky sojama ýerini dolmaz,

Suwa gaçsaň, suw üstüne sal gerek.

Ölüm gorkuly däl, ölseň hak zada,

Zol, gorkup ýörmeklik gelişmez ada,

Bolmalysy bolar, gygyrma dada,

Göni garşy durma, Rüstem Zal gerek.

Bu ýagty «Ýalançyň» ady galp munda,

Çyna berimsizdir sözi galpyňda,

Dönüp döwüşmäge, «Göwün solpunda»,

Armandan çykara, çyn ahwal gerek.

Eýýam täzelener, döwürler geler,

Soňy näme bolar, bir Alla biler,

Nesiller dowamdan paýyny alar,

Bagtyýar bolmaga hoş ykbal gerek.

Alla ýardam eýläp, bersin rysgyňy,

Goldaw görse, güýçli eder asgyny,

Ýürek iňläp beýnä berse sarsgyny,

Başyňy dyndara bir hyýal gerek.

Ýagşy aýal bakyşynda ýakymly,

Ýaman duşsa iňirdär ýör hökümli,

Illi aýdar, ynjytmagyn hiç köňli,

Onuň üçin ýagşy niýet-päl gerek.

Ilmämmet ALLAGULYÝEW.