Sowuk ýarag diýersiň...

Ýöne ol onuň sowukluguny duýmady. Duýdansyz urgy köz basylan ýaly duýuldy. Sesiniň ýetdiginden gygyrjakdy. Käşge... Başarmady. Saňňyrdaýan eller üç sapar \"hylkyldatdy-da\" emaý bilen oturtdy. Soňam garasyny garaňkylyga gizläp ýoluna siňdi.

Beýle sahnalary kinolarda juda kän görüpdi. Häzir bolsa şol sahnalardaky \"üşäp\" ölýän gahryman onuň özi bolmaly ýaly duýuldy. Ol şol gahrymanlara \"öýkündi\". Ýarasyny goýan elini synlady. Suwuklyk. \"Ganyň reňkindäki suwuklyk\". Içinden şeýle diýip oýlady. Eger gan diýip oýlamasa hemme zat gowy bolaýjak ýalydy. Ýerinden turjak boldy. Baý-buuw, agyraýşyny muň. Hiç zadyň çeni-çaky däl. Kinodaky ýaly däl. Aýagyna galyp ýöräp gidibermedi. Ýere emaý bilen oturdyp giden ýaňky garaňkylyk muň böwrüni deşip içine ýylan salyp gidäýen bolmaly. Gozganjak bolsa \"çakyp\" dur. Oturdylan ýerinden gymyldaman otursa-da şol ýylan içinde müňňüldäp ýören ýaly. Ýuwaşjadan ýara jaýyndan syrygyp gaýdýa-da gyzgynjak bolup elinde duýulýa. Ol, ýylanyň oturan ýerindäki topragyň üstüne süýnüp, ýodajyk ýasap özünden kem-kem uzaklaşýandygyny ýaňy aňşyrdy. Onuň ýerde düýrlenen bedenine-de indi gözi düşdi. Şoň bilenem görejiniň ýagtylygy duýuşy peselip barýanyny öwrendi. Asmana seretdi. Ýaplanyp oturan arçasy ondan Aýy gizleýärdi. Boljagynyň bolup barýanyny aňdy. Kaýyl bolmalymy ýa-da bir umyt...

Uklady...

Gözüni açdy.

Ýagtylyk...

Olaryň hemmesi ak eşikdediler...

© Şyhnazar DURDYÝEW