Duracell kompaniýasy AAA görnüşli firma batareýasynyň görnüşinde M150 ady bilen kuwwatly daşarky akkumulýatory çykardy. Pauerbankyň sygymy 25 müň mAs bolup, bir wagtyň özünde oýun konsolyna, noutbuga we smartfona zarýad bermäge mümkinçilik berýär diýip, ferra.ru habar berýär.

Batareýadan MacBook Pro 16 derejesindäki noutbuga, Steam Deck konsolyna we islendik smartfona zarýad bermek bolýar. Pauerbank USB-A we USB-C portlary bilen üpjün edildi, gapagyna ony MagSafe-ly iPhone bilen bilelikde ulanmaga mümkinçilik berýän simsiz magnit zarýad berijisi gurnaldy. Gapagyň aşagynda elektrik kabellerini saklamak üçin ykjam ýer bar.

M150 akkumulýatorynyň agramy 800 gram, beýikligi 16,25 sm. Toplumda pauerbank üçin 300 gram agramly zarýad beriş stansiýasy bar. Gajetiň bahasy 200 dollara barabar.