...Gözlerini ýumdy, ýene-de açdy.

Gözlerini açdy, ýene-de ýumdy.

Soň gözlerin açdymy ýa açmady,

Onçasyny häzir aýdyp biljek däl.

Ýöne eýýäm Gülnäz ondan daşdady.

Bir haýukdan \"Gülnä-äz! Gülnäzim!\" diýip,

Zaryn sesi ýetdi meniň yzymdan,

Gara saçlam \"Dolan yzyňa\" diýip,

Çyrpynjyrap, aslyşsa-da yzymdan.

Her örümin bir elimde tokgalap,

Öýmüze ýetenmi duýman galdym men

Şo bolup ýörşüme häzirem haýran,

Ýok, oňa şo wagtam haýran galdym men.

Sebäp diýseň illeň aýdyşy ýaly

Haýasyzlaň hasabynda däldim men.

\"Aýnaň gyzy - bälçik\" diýýänler kändi.

\"Aýnaň gyzy - alçak\" diýýänler kändi.

\"Haýasyz!\" diýýäne duşmaklyk kyndy.

Ýöne weli, meniň bu bolup ýörşüm

Haýasyzlyk çägine-de ýakyndy.

\"Ýeri, bir ýigidi söýdüň, taň etdiň

Arzyny gaçyryp ýörmegiň näme?

Söýýän bolsa özi gelsin, halatsyn,

Özüňi üstüne sürmegiň näme?\"

Diýip, öz ýanymdan özüm utanyp,

Gyzardym, agardym, boz-ýaz boldum men.

(Goýberen hataňy salaňda ýada,

Ýanyňda hiç kişi bolmaýanda-da,

Ýüzüň gyzarýanny şonda bildim men).

Gözümi ýumsam-da irkiljek bolup,

Beýnim öz erkini bermedi uka,

On alty ýaşyma ýetip-ýetmänkäm,

Bu neneň hekaýat, bu neneň waka!

(Ýa-da haýa-şerim paýlanan wagty

Men naçara ondan ýetmedimikä?)

Dogrudanam, şeýle haýasyzmykam?

Aslynda, nämekä haýa diýlen zat!

Ejem janyň gürrüň berşi boýunça,

Haýa - adamdan soň dünýa inen zat.

Bir mahal şeýle

bir döwür bolanmyş.

Haýasyz bolanmyş dünýäň gyzlary

Bolmanmyşyn çigit ýaly näzleri

Haýsy ýigit gözlerine ýarasa,

Ilki bilen aslyşarmyş özleri.

Alla bu ahwala der-gazap bolup,

Haýa diýen zady inderenmişin.

Şeýdip bütin dünýäň gelin-gyzlaryn

Uly bir beladan dyndaranmyşyn.

Şondan soň gyzlaryň özi lak atman

Ýigitler öňürti başlanmyş söze...

hawa bu rowaýat

Ajap rowaýat

UTANÇ

IŇ BIRINJI BEZEGDIR BIZE.

Hawa, bu hekaýat

Täsin hekaýat

Ony ýaňsylamak ýüregimde ýok

Ýigitleň boýnunsan aslyşyp ýören,

Beýle gyzlar tutuş Garagumda ýok.

Ýöne weli, söýülýänni bilensoň,

Ilki bilen gyz hem duýduryp biler.

Parhy nämemişin, ikisem bolar

(Käte gyz duýdurar, käte-de oglan

Näme bir-birinden pesmişmi olar).

Şeýdip öz-özüme teselli berip,

Daňyň öň ýanynda gitdim men uka

On alty ýaşymdan ötüp-ötmänkäm,

Bu neneň ahwalat,

Bu niçik waka!..

On bäş ýyllap Eziz diýip gezenim

Şeýtdi-de kem-kemden Ezizim boldy.

\"Haram, tula, ylga guýyň başyna

Hanha, maňkalyja Eziziň geldi!\"

Diýip, obamyzyň Bibişeýtany

Sanjardy böwrümden \"iňňesi\" bilen.

Bir gün selin ýygyp ýören wagtymdy,

Gabat geldim onuň Tüňňüsi bilen.

Bir garry ojaryň garry töňňesin,

Urýar, depýär, döwjek bolýa bolanok

Laliksiräp ösen \"ejemoglujyk\"

Bir çüýrük töňňä-de hötde gelenok.

(Gujagna bir gyz salaýanda-da,

Nädip oňarjagyn men-ä bilemok).

Beletdim men o tetelli ojara

Omurar ýörerdim çep elim bilen.

Ýygan selinlermi bir ýere toplap,

Bogmaga oturdym gök selin bilen.

Onýança-da maňa gözi düşdi-de

Töňňäni herrelip, girrelip depdi.

Töňňe-de serrelse, serreldi weli,

Özi ondan beter serrelip gitdi.

Mahal-mahal seniň bolgusyz zada

Gülkiň tutýar weli, goýjak miltiň ýok

Agzyňy tutsaňam etjek zadyň ýok,

Burnuňy tutsaňam etjek zadyň ýok.

Gülesim gelse-de, gülmejek bolup,

Dodagymy dişläp, \"başagaýdym\" men

Hojam juwazçyny ýadyma salyp,

Dogrusy, gülkimi zordan goýdum men...

Dowamyny 30 ❤-dan soň goýjak

Halan bolsaň, dowamyny okamak isleseň👉❤