Säherler duşan ýyldyzlar,

Bu serimiň humarydyr.

Öýländen soňky salgymlar,

Belki, gözüň gubarydyr.

Ömürler seresi - ýaşlyk,

Arzuw

hyjuw

joşa - joşluk,

Şygra çeken gyzgyn guşluk,

Düşseň yşkyň bazarydyr.

Menziller nepis lälezar,

Duşarmy munda ýara ýar.

Seň üçin biri bikarar,

Köňül özgäniň zarydyr.

Kalba goş bolmaz çem gelen,

Kalby boş gider emgenen.

Ahyr birinde eglenen,

Giç bazarçyň nazarydyr.

Ykbalyňa bolsaň boýun,

Durmuş ýene etse oýun.

Şo-l gözlaniň duşsa bu gün

Buda janyň azarydyr.

Allamyrat Sazakow