15-16 ýaşlaryndaky ýetginjek awtobusa münüpdir. Awtobusda hiç kimiň ýoklugyny gören oglan begenipdir. Islän ýeriňde oturybermeli!

Ol penjiräniň öňüne geçip, jaýlaşykly oturypdyr. Sebäbi onuň barmaly ýeri ahyrky duralga eken. 10-15 minutdan soň awtobusyň içi ýolagçylardan dolupdyr. Oglan bolsa töweregi synlap, saz diňläp oturan eken. Birden orta ýaşdan agan zenanlaryň biri onuň egnine kakypdyr-da şeýle diýipdir:

— Utanaňokmy beýdip oýkanjyrap oturmaga, ejeň ýaly adamlar-a aýak üstünde dik dur. Biz seniň ýaşyňdakak özümizden ululara ýer bererdik.

Onuň bu sözlerini ikinji biri alyp göteripdir:

— Göwräňden utan, sagat halyňa otyrsyň, keselbent garry ene-de aýak üstünde dur!

Sähel salymyň içinde ýigide nägilelik bilen, ýazgaryjy sözleri aýdanlar has-da köpelipdir.

Oglan ýagdaýa çydap bilmän, ahyry şeýle diýipdir:

— Bolýar, men häzir turmakçy, ýöne, goý, bu ýerde maňa aýdan sözleri zerarly ýüzi gyzarmajak kişi otursyn.

Onuň bu sözleri ýolagçylary oýlanmaga mejbur edipdir. Oglan tagaşyksyzlyk bilen oturgyjyň astyndan nämedir bir zatlary almak üçin egilipdir. Ine-de, ol pişeginiň bir taýyny, soňra beýleki taýyny çykarypdyr. Soňra ol pişegine daýanyp, zoraýakdan dikelipdir.

Töweregindäkiler aňk-taňk bolupdyrlar. Hiç kim bu oglan beýle ýagdaýdadyr öýdüp pikir etmändir eken... Gaharlanyp ýolboýy ýetginjegiň aýagyna basan daýza bolsa, bu ýagdaýa oglanyň näme üçin asla üns hem bermänligine indi düşünipdir. Ahyrky duralga çenli awtobusdakylar dymyp gidipdirler. Oglan, kyn hem bolsa, pişegine daýanyp dik durup gidipdir. Belli bir derejede penjiräniň öňündäki kürsiniň ahyrky duralga çenli boş galanlygy hem oňa gurbat beren bolsa gerek.