Garaz, doglan gün gutardy. Myhmanlary ugratmaga çykdym. Roza ýuwaşlyk bilen meň ýanyma geldi. Biz oň bilen ýuwajadan ýöräp barýarys.

-Massimus, seň meni nähili söýýändigiňi bilýän, dogrudanam sen gowy oglan.

-Ony aýtdyň.

Ýöne sen özüňe mynasyp gyzy taparsyň.

-Onam aýtdyň.

-Men saňa mynasyp däl.

-Nämüçin?

-Meň durmuşym saňa görnüşi ýaly däl, meň ýene bir durmuşym bar, meň ýabany dünýäm bar, ol ýerde sen ýaşap bilmeýäň.

-O nähili ýabany dünýä, sen içgilimi Roza?

-Soň saňa hemmesini gürrüň bererin, häzirlikçe hoş, meni bagyşla Massimus.

Ol şeý diýdide ýabyň boýundan gyzlar bilen bile ýöräp gitdi. Men eşiden zatlaryma doly düşünip bilmesemem, olaryň yzlaryndan seredip durdum. Birdenem çirkin ses eşidildi.

-Massimussss, Massimusss. Men olaryň yzyndan ylgadym. Roza ýerde huşsuz, samyrdap ýatyrdy.

-Näme boldy.

-Ony ýylan çakdy, Massimus kömek et.

-Ýylan, näääddiiip.

Roza bolsa şol samyrdap ýatyrdy:

-Bagyşla meni, meni bagyşla...

Etrap hassahanasy. Lukman ýaňy özüne gelen gyzyň hal-ýagdaýyny barlaýar.

-Lukman maňa näme boldy?

-Sizi ýylan çakypdyr, indi hemme zat gowy, ýagdaýyňyz kanagatlanarly. Tüweleme, çöregiňiz bitin eken, wagtynda ilkinji kömegi alypsyňyz.

-Meni bu ýere kim getirdi?

-Bir oglan, ýene iki sanam gyz, klasdaşyňyz diýdimi, nämemi? Umuman-a olar we Siziň hossarlaryňyz daşarda garaşyp durlar. Isleseňiz ýanyňyza çagyryp bilerin.

Gapyny ýuwaşlyk bilen açyp içeri girdim. Roza meni görüp ýerinden turjak boldy. Oň görnüşi öwerlik däldi. Öňki aýa bäs edýän ýüzüniň reňki öçüpdir, deňiňden geçende süňňüňi elendirýän anbar ysly saçlary bulaşyk, göni ýüregimiň içine seredýän gedem, buýsançly, syrly gözleri bolsa gussaly, aladaly.

-Salam Roza, gowumy ýagdaýlaryň?

-Erbet däl, ýöne özümi birhili ýylan çakan ýaly duýýan. Ýogsa-da sag bol Massimus. Sen bolmadyk bolsaň belki men häzir...

-Ýok, sen güýçli gyz, emgek bolup geçsin.

-Men saňa bir zat aýtmaly. Men seni.....

Gapy batly açyldy. Saşka bilen Mekan geldi. Mekan:

-Roza gowumy ýagdaýlaryň, eşidip gaýdyberdik, gynandyk dogrusy. Nebir ýylanyň üstünden ökjeli köwşüň bilen basyp oň gelşigini gaçyrypsyň, indi ol ýylan köpçülige çykyp bilmän ýörenmişin.

Roza çalaja ýylgyrdy.

Saşka:

-(Maňa seredip) "Möý adam" gowumyň. Rozany ýörite yzarladyňmy ýa uçup ýörkäň gabat geldimi?

-Geleniňiz üçin köp sag boluň.

Men:

-Bolýar onda Roza, sag amanja gutul!

-Köp sag bol.

Menem oglanlar bilen çykdym. Daşarda Rozanyň bir topar garyndaşlary garaşyp duran eken. Ýolda gelýärkäk Saşka:

-Dost, "Söýgüniň güýjündäki" Sani ýaly Rozanyň aýagyndaky zäheri sorup aýyrdyňmy?

-Ýok dost, ony göterip Gurbangeldi tebiplere eltdim, näme eden bolsa, şol etdi.

-Saniň rolunda ekranda ilkinji gezek Gurbangeldi agada?

-Howwa.

-Eýtdiň, beýtdiň oň gahryman-a bolduň ýöne. Eger meni ýylan çakan bolsa menem göterip Gurbangeldilere äkiderdiňmi?

-Ýok. Men Gurbangeldiň dostawşigi däl, günde oňa klient eltip berer ýaly. Seni göterip direktorymyzyň gapysynyň agzyna oklardym, goý sen ölensoň olam süýrelsin.

Mekan:

-Men-ä Massimus ýylan çakany bejerýär diýseler belki gemoroýym, zadymam görüp berer diýip ýördüm.

-Görüp bereýin dost, soň Gurbangeldä bejerdäýersiň.

Öýe geldim. Ejem:

-"Tiz kömek" gowumyň, "däli gaçsa öýe gaçmaz" diýip öýede gel arasynda. Ýogsa-da gelinbaý nähili?

-Gelinbaýyň-a tanamok, ýöne Roza özüne geldi.

-Tanamok diýip soňam özüne geldi diýýäňmi?

-Eje men-ä biraz dynç aljak.

Öz otagyma girip, ýene sen hakda pikirlendim. Ýene seni ýatladym. Ýatlamalar, senli ýatlamalar. Meni ömrümiň soňuna çenli ýeke goýmajak pursatlar. Hyýalymda senli günlere kän dolanýan. Bagtly günlerimiň bagtsyz ýatlamalary. Belki sen barada hiç haçan hiç kime gürrüň bermezdim. Diňeje hyýallarymda, içki dünýämiň gözel äleminde ýaşardyň belki.

Äpet okean. Söýgümiziň simwoly bolan gämi. Şol filmi meň halaýanym üçin söýüp göreniňi aýdypdyň senem.

Garaňky gije, sergin şemala ülpüldeýän ýaýylan gara saçlaryň kümüş aýyň ýagtysyna hasam gözel görünýär. Titanigiň öňünde ikimiz äpet, asuda okeana seredip ganat ýaýyp ýüzüp barýarys. Biziň barýan ýerimizde ýalan, gybat, görüplik, dönüklik ýok. Ol ýerde diňe söýgi bar. Sen we men. Biziň tamamlanmadyk, asla tamamlanmajak söýgi hekaýamyz bar...