Goňşymyň gyzy.

Aýdym aýdýar, garga ýaly gygyryp, Goňşymyň lälijek, ýaltaja gyzy.
Sazyn çalýar, gapdalyndan sygyryp, Goňşymyň lälijek, ýaltaja gyzy.

Ýazyp-bozup, kitap okap bilmeýär,
Tikin tikip, haly dokap bilmeýär.
Gün gyzýança, düşeginden galmaýar,
Goňşymyň lälijek, ýaltaja gyzy.

Haçan görseň, uzyn pallap gernip dur,
Gaharlanyp, ejesine sürnüp dur.
Ýakasyndan, kirli döşi görnüp dur,
Goňşymyň lälijek, ýaltaja gyzy.

Işlemeýär, ýalta janyn aýaýar,
Gözün-gaşyn, dürli reňke boýaýar.
Özüni gözelleň, gözeli saýýar,
Goňşymyň lälijek, ýaltaja gyzy.

Ýylgyranda, agzy-burny gyşykdyr,
Uz basanda, aýaklary çaýşykdyr.
Men nätsemkäm?
Oglum bilen söýşüpdir,
Goňşymyň lälijek, ýaltaja gyzy.

Täçnazar Allalyýew.