Täze giýewiñ aýdymy
(degişmeden çyn)
Sowgat edip dünýäñ gözel gülüni,
Gyzyñyzy hor etmerin daýzajan.
Zyýan etmez kem salsanyz galyñy,
Gyzyñyzy hor etmerin daýzajan.
Maşynym ýok , ýokdur üýtgeşik öýüm,
Halal çörek iýmek maksadym küýüm,
Mynasyp zahmetden gaçyrman boýun
Gyzyñyzy hor etmerin daýzajan.
Ahlakdan nurlansyn külbämiñ içi ,
Gyrkmazlygy öwret goý össün saçy,
Aýdym aýtmasada toýumyzda Hajy
Gyzyñyzy hor etmerin daýzajan.
Käriñ kyny añsadyna seretmen
Söýenime razy bolup pelekden
Rysgalymyz geçip dursa elekden
Gyzyñyzy hor etmerin daýzajan.
Juda kär tapmasam bagşy bolaryn
( iller aýdýa menem oñşybererin)
Toýlaryny sowup goñšy golamyñ
Gyzyñyzy hor etmerin daýzajan.
Çaga geler durmuşymyz özgerip,
Törümizde sallançaklar üwrelip
Ezizowyñ hüwdüsini öwrenip
Gyzyñyzy hor etmerin daýzajan.
Bir birege mylaýymja gepleşsek
Juwanlykda laýna girip ötmesek
Pulumyzy boýagna sarp etmesek
Gyzyñyzy hor etmerin daýzajan.
Beripsiñiz edepleriñ gowusyn
Juda söýdüm maşynsyz kir ýuwuşyn
Işe barýan ýollar iýse köwüşin
Gyzyñyzy hor etmerin daýzajan.
Baýlyk däldir beýik bagtyñ girewi,
Çyn duýgudyr bagtyñ sarsmaz küregi
Urup dursa Kerimhallyñ ýüregi
Gyzyñyzy hor etmerin daýzajan.
Kerim Hally