Men hiç kimden üýtgeşik däl,

Ýok hiç hili artyk zadym.

Ýaşap ýörün araňyzda

Biri bolup adamzadyň.

Öýümem ýok maşynymam,

Işimem ýok, işgärimem.

Ýaşaberseň, ýaşamaga,

Ýetmez eken işläniňem.

Iller ýaly dakynamok,

Goşa-goşa gyzyl-göwher.

Diňe birje barmagymda

Nika ýüzük ýanyp öwser

Geýinemok ilden zyýat

Toý- tomaşa ýelek köýnek

Ýöne halal zähmetime

Gaýnap otyr gazan-çäýnek.

Iller ýaly eje-kakaň

Mirasynda gözümiz ýok.

Allaň ýazan ykbalyna

Nägilelik sözümiz ýok.

Ýene bir zat Alla şükür

Maşgalam bar söýgä doly

Şolaň jany sag bolsun diýp,

Paýlasak bor  hudaýýoly.

Bagtly biz, bizden bagtly

Görmedim men henize çen.

Şükür Alla, maýyp-müjrüp

Dogulmadyk illerden kem.

Şonuň üçin bu gününiň

Barlygyna şükür ediň.

Şu günlere ýetmedikleň

Bardygyny pikir ediň.

Merjen Jumaýewa