Seýran içinde

Eý, ýaranlar, musulmanlar,

Bir gije seýran içinde,

Otuz iki kişi gördüm

Ol şahy - merdan içinde.

Olarga berdim salamy,

Sordular saglyk, kelamy,

Şyhy - Seýit, Molla Jamy,

Ol ýedi soltan içinde.

Soltan Weýis, Pähliwany,

Hekim ata, Süleýmany,

Hoja Ýusup - Hemedany,

Şol şahy Kengan içinde.

Türküstan eýesi serwer,

Ymam Käzim, ymam Jafar,

Ýahýa bilen Nuh pygamber,

Baýezit soltan içinde.

Gözel pirler - gözel ýarlar,

Çekdiler bu ýolda zarlar,

Ymam Ryza, şah-u pirler,

Niçe gözel jan içinde.

Magtymguly syrym çokdur,

Men neýläýin, açan ýokdur,

Ölmek - hak, dirilmek - hakdyr,

Okydym "Kuran" içinde.