Şu gün agşam — 7-nji oktýabrdan 8-nji oktýabra geçilýän gije San-Diegoda (Kaliforniýa ştaty) «Bellator 300» ýaryş agşamynyň tutluşyklary geçiriler.

Bellatoryň ýubileý ýaryşynda ýarym agyr agramda çykyş edýän türkmen türgeni Döwletjan Ýagşymyradow hem tutluşar. 34 ýaşly ildeşimiz «Bellator 300» ýaryş agşamyndaky şol duşuşygynda polşaly agramdaşy Maseý Rozanskiniň garşysyna çykar. Munuň özi Döwletjanyň şu promouşeniň çägindäki bäşinji tutluşygydyr.

Döwletjan Ýagşymyradowyň şu ýylyň martynda «Bellator 292-niň» çäginde geçiren ahyrky tutluşygynda eminleriň biragyzdan gelen netijesi esasynda litwaly Julius Anglikasy ýeňendigini ýatladýarys.

Başarjaň türkmen türgeni başa-baş söweşler boýunça ýoluna karateden başlady. Onuň sportuň şu görnüşinden gazanan ynamly ýeňişleriniň sany barmak büküp sanardan has köpdür. Döwletjanyň göreş boýunça ýaryşlarda hem uly üstünliklere ýetendigini bellemelidiris. Onuň tutluşygy ýatan ýeriňden alyp barmak boýunça ussatlygynyň kämilleşýändigi bolsa, pälwanyň duşuşyklarynyň her birinde aýdyň görünýär. D.Ýagşymyradow 2018-nji ýylda АСВ-niň çempiony boldy. Çempionlyk adyny iki gezek goranyndan soň bolsa «Bellator» bilen şertnama baglaşdy.    

Rozanski barada aýdylanda bolsa, ol ahyrky duşuşygyny şu ýylyň fewralynda guralan «Bellator 291-iň» çäginde britaniýaly Karl Muryň garşysyna geçiripdi we ýeňlişe döz gelipdi.

Döwletjan Ýagşymyradowyň professional karýerasy 20 ýeňişden, 7 ýeňlişden hem-de 1 deňlikden ybaratdyr.

Maseý Ružanski bolsa 14 ýeňşe eýelik edip, 4 ýeňlişe sezewar boldy.

Şol ýaryş agşamynda meşhur Habib Nurmagomedowyň jigisi Usman Nurmagomedow ýeňil agramdaky çempionlyk tutluşygyny geçirer. Ol Brent Primusyň garşysyna oktagona çykar.





Baydagmyzy pasyrdatmagyny Arzuw edyan...