Men goşgy ýazýaryn gursagmy ýaryp

Ony çepbesine çöwürip ýazýan

Bu goja dünýäniň gowgasyn undyp

Armanym arzuwa öwürip ýazýan

Ýazýaryn ilkinji söýgi hakynda

( Ýüzümde-de iç ýananyň gülkisi)

Ýasama ýylgyryp çozýar üstüme

Yşkdan galan ýatlamalaň hemmesi

Ýazýaryn döwülen umytlar hakda

Ýöne ol şonda-da atam deý merdem

Aýagna daş degip ýykylan çagy

Gör, näçe gezekler galdyrdym ýerden

Lira kimin kakyp ýürek kirşini

Onuň şirin owaz taryny ýazýan

Şatlygymy ýazýan, gussamy ýazýan

Baryny ýazýan...

Ilmyrat Babaýew