Tankyt

Mesgeni näbelli Eýranmy, Türkmi,

Är-aýal ýaşanmyş howlusy görkli.

Aýal her gün, penjireden bakýarmyş,

Goñşyñ howlusyna ünsün çekýärmiş.

Ärine seredip, başlarmyş gepe:

-Seret goñşularyñ, howlusy hapa.

Ýogsa günde tämizleýär aýaly,

Onuñ iş edişi çalarak ýaly...

Diýip goñşularny tankytlarmyşyn,

Äri gepe biparh,

Okaýarmyşyn.

Ertir irden ýene penjirä garap,

Himýaly boýalan saçyny darap.

Tankytly gürrüñe başlanmyş ýene:

-Günüñe ýanaýyn muny görsene.

Howly ýene hapa, zenan işleýär,

Ýöne näme üçindir kiri süýşmeýär.

Belki süwsesiniñ hili pesräkdir,

Ýa-da musur alýan pili poslapdyr...

Diýip ol gepine nokat goýanmyş,

Äri gepe biparh, gazet söýenmiş.

Ynha ýene bir gün tankytçy zenan,

Endik bilen baryp ýan:na penjiräñ.

Seretse daşary juda täsinmiş,

Goñşulañ howlusy biçak tämizmiş.

Diýýärmiş ýanyna çagyryp ärin:

-Ahyr tapypdyrow ýuwmagyñ tärin.

Seretsene oña diýseñ arassa.

Äri ýylgyranmyş agrasdan, assa.

Hemem gürlänmişin agramly, şowly:

-Aslynda hemişe arassa howly.

Ýöne bu gün irräk açdym-da gözi,

Gowja edip ýuwdum penjirämizi...

Garaz bu myş-myşyñ ýorgudyn ýorsak,

Tankytda halalja bolmaly gursak.

Ilki arassalap öz öýüñ tamyn,

Soñ ýuwup bilersiñ ýüz öýüñ tamyn.

Kerim Hally