Göwün guşum uçup gitse asmana,

Ara eýýam daşdyr ony tutmana.

Aýagym ysmaýar ýere basmana,

Hemme zat ýat bolýar, Ylham gelende.

Öz dünýäme çümüp gitýärin birden,

Ýadowlyk, agyry, duýmaýar beden.

Oýa batyp siňipdirin goşgyma,

Bir seretsem, günem dogaýan eken.

Hiç goýbermän elim galamy tutýar,

Gysýar bar güýjünden, durmanam ýazýar,

Ak kagyzyň ýüzi şygyrdan dolýar,

Bady peselmeýär, Ylham gelende

Bu ýagdaýda, juda howsala gelýär,

Heýjan joşup, birden ýürege berýär,

Gyzdyryp, gaýnadyp, sowadyp geçýär,

Ýüregim möwç urýar Ylham gelende.